İsveç sanksiya siyahısında olan Rusiya gəmisini saxlayıb

 İsveç sahil mühafizə xidməti həm ABŞ, həm də Avropa İttifaqının sanksiya siyahısında yer alan Rusiyaya məxsus gəmini saxlayıb. Bu barədə ölkənin milli yayımçısı SVT məlumat yayıb.

Söhbət "M Leasing LLC" şirkətinə məxsus "Adler" adlı yük gəmisindən gedir. Bildirilir ki, bu şirkət Rusiyaya hərbi təyinatlı yüklərin, o cümlədən Şimali Koreyadan gələn silahların daşınmasında iştirak etdiyi üçün qara siyahıya salınıb.

 Hazırda İsveç səlahiyyətli orqanları gəmi göyərtəsində olan yükün tərkibini və təyinatını müəyyənləşdirmək üçün genişmiqyaslı yoxlama tədbirləri həyata keçirir.

 Gəminin saxlanılması beynəlxalq sanksiyaların icrası və qanunsuz silah ticarətinə qarşı mübarizə tədbirləri çərçivəsində baş tutub. İstintaqın nəticələrindən asılı olaraq gəmi və yük barəsində növbəti hüquqi addımların atılacağı gözlənilir.