5 milyonluq qaçaqmalçılıq işi: Tanınmış iş adamı Ruslan Eyyubov həbs edildi

Azərbaycanda 5 milyon manatlıq siqaret qaçaqmalçılığı ilə bağlı aparılan genişmiqyaslı istintaq çərçivəsində tanınmış iş adamı Ruslan Eyyubov saxlanılıb. Baş Prokuror yanında Korrupsiyaya qarşı Mübarizə Baş İdarəsi tərəfindən aparılan cinayət işi üzrə onun barəsində məhkəmə qərarı ilə həbs qətimkan tədbiri seçilib. 

Həbslərin zəncirvari əlaqəsi:

Bir neçə gün əvvəl eyni cinayət işi ilə bağlı Bakı–Hövsan Beynəlxalq Ticarət Dəniz Limanının rəisi Rəşad Daşdəmirov və digər şəxslər də həbs edilmişdi. Qeyd olunur ki, sözügedən liman məhz Ruslan Eyyubova məxsusdur.

 Qohumluq əlaqələri və vəzifəli şəxslər:

Ruslan Eyyubov — Prezidentin Mühafizə Xidmətinin keçmiş rəisi, general-polkovnik Bəylər Eyyubovun qardaşı oğludur.

O, həmçinin Dövlət Gömrük Komitəsinin Dəniz Nəqliyyatı və Enerji Resursları Baş Gömrük İdarəsinin bir neçə gün əvvəl vəzifəsindən azad edilən rəisi, general-mayor Həsən Eyyubovun qardaşıdır.

 Ruslan Eyyubov təkcə liman sahibi deyil, həm də ölkənin kimya sənayesi sahəsində tanınan nəhəng şirkətlərindən biri olan “NB Qrup” un rəhbəridir.

 Hazırda istintaq qrupu qaçaqmalçılıq sxeminin digər iştirakçılarını və dövlət büdcəsinə dəymiş ziyanın tam miqyasını araşdırır. Mövzu ilə bağlı rəsmi qurumların geniş açıqlama yayacağı gözlənilir.