S-500 Prometey-in ilk HHM diviziyası döyüş növbətçiliyinə başlayıb

Rusiyanın ən müasir zenit-raket kompleksi olan S-500 "Prometey"-in ilk formalaşdırılmış Hava Hücumundan Müdafiə və Radioelektron Mübarizə (HHM/REM) diviziyası rəsmən fəaliyyətə başlayıb.

Xatırladaq ki, bir il əvvəl – 2024-cü ilin dekabrında Rusiya Silahlı Qüvvələrinin Baş Qərargah rəisi Valeri Gerasimov S-500 sistemləri ilə təchiz olunmuş ilk alayın formalaşdırılmasının başa çatdığını bəyan etmişdi.

Hərbi ekspertlərin ehtimalına görə, sözügedən diviziya Krımın müdafiəsi üçün yerləşdirilə bilər; çünki sistemin tərkibinə daxil olan "Yenisey" RLS (Radiolokasiya stansiyası) artıq yarımada ərazisində Ukrayna kamikadze dronlarının hədəfinə çevrilib.

S-500 sistemi təkcə təyyarə və dronları deyil, həm də yaxın kosmosdakı hədəfləri və ballistik raketləri məhv etmək qabiliyyətinə malikdir ki, bu da onu dünyanın ən güclü müdafiə sistemlərindən biri edir.